അയര്‍ലണ്ടിലെ ജീവനക്കാരില്‍ മാനസികാരോഗ്യ പ്രശ്നങ്ങള്‍ കൂടുന്നു, നാല് ജീവനക്കാരില്‍ ഒരാള്‍ മെന്റല്‍ ഹെല്‍ത്ത് അവധിയില്‍

ഡബ്ലിന്‍ : അയര്‍ലണ്ടിലെ ജീവനക്കാരില്‍ മാനസികാരോഗ്യ പ്രശ്നങ്ങള്‍ കൂടുന്നതായി ഏറ്റവും പുതിയ സര്‍വ്വേ റിപ്പോര്‍ട്ട്.കഴിഞ്ഞ വര്‍ഷം നാല് ജീവനക്കാരില്‍ ഒരാള്‍(24%) മെന്റല്‍ ഹെല്‍ത്ത് അവധിയെടുത്തെന്ന് റിപ്പോര്‍ട്ട് പറയുന്നു.യൂറോപ്യന്‍ ശരാശരിയേക്കാള്‍ (18%) നേക്കാള്‍ കൂടുതലാണിതെന്ന് പേയ്‌റോള്‍, എച്ച്ആര്‍ സൊല്യൂഷന്‍സ് ദാതാവായ എസ്ഡി വോര്‍ക്‌സിന് വേണ്ടി ഐവോക്സ് നടത്തിയ സര്‍വേ ചൂണ്ടിക്കാണിക്കുന്നു.

ജോലി മാനസികാരോഗ്യത്തെ പ്രതികൂലമായി ബാധിക്കുന്നുണ്ടെന്ന് 29% ജീവനക്കാരും സമ്മതിച്ചു.മാനസിക സമ്മര്‍ദ്ദമുണ്ടാക്കുന്ന ജോലിയാണ് ചെയ്യുന്നതെന്ന് 50% ജീവനക്കാരും പറയുന്നു. എന്നിരുന്നാലും ഇക്കാര്യം തുറന്നു ചര്‍്ച്ച ചെയ്യുമ്പോള്‍ സുഖം തോന്നാറുണ്ടെന്ന് 45% പേരും പറയുന്നു.

മാനസികാരോഗ്യ പ്രശ്നങ്ങള്‍ കൈകാര്യം ചെയ്യാനുള്ള ഇടപടെലുകള്‍ സജീവമായി സ്ഥാപനങ്ങള്‍ നടത്താറുണ്ടെന്ന് 43% ജീവനക്കാര്‍ പറയുന്നു.അവധിയെടുക്കുന്നത് മറ്റൊരു മാനസിക പ്രശ്നമായി ജീവനക്കാരെ അലട്ടുന്നതായും സര്‍വ്വേ റിപ്പോര്‍ട്ട് പറയുന്നു.39% പേര്‍ക്കും ജോലിയില്‍ നിന്ന് മാറിനില്‍ക്കുന്നത് കുറ്റബോധത്തോടെയാണെന്നും സര്‍വേ കണ്ടെത്തി.ജീവിതപ്രശ്നങ്ങളും സാമ്പത്തിക പരാധീനതകളും മൂലം അസുഖ ബാധിതരാണെങ്കിലും ജോലി ചെയ്യാന്‍ 39% ജീവനക്കാരും നിര്‍ബന്ധിതരാകുന്നു. 56% പേരും ഉപജീവനമാര്‍ഗമായി കാണുന്നത് അവരുടെ ജോലിയെ മാത്രമാണെന്ന് എസ് ഡി വോര്‍ക്സ് വിശദീകരിക്കുന്നു.

പല വിധ സമ്മര്‍ദ്ദങ്ങള്‍ക്കിടയിലും 53% ജീവനക്കാര്‍ ജോലി-ജീവിത സന്തുലിതാവസ്ഥയില്‍ സംതൃപ്തരാണെന്ന് സര്‍വ്വേ പറയുന്നു. അതേസമയം ജീവനക്കാരുടെ ക്ഷേമത്തെ പരസ്യമായി പിന്തുണയ്ക്കാറുണ്ടെന്ന് 69% പേരും പറയുന്നു.ജോലിസ്ഥലത്തെ ക്ഷേമവും മാനസികാരോഗ്യവും സംബന്ധിച്ച ചില പ്രവണതകളെ എടുത്തുകാണിക്കുന്നതാണ് ഈ സര്‍വ്വേ റിസള്‍ട്ടെന്ന് ഇദ്ദേഹം ചൂണ്ടിക്കാട്ടുന്നു.

ജീവനക്കാര്‍ വലിയ സമ്മര്‍ദ്ദത്തിലാണെന്ന വസ്തുത അംഗീകരിച്ച് കൂടുതല്‍ സൗഹാര്‍ദ്ദപരമായ സമീപനം സ്വീകരിക്കണമെന്ന് എസ് ഡി വോര്‍ക്സ് അയര്‍ലണ്ടിലെ കണ്‍ട്രി ലീഡര്‍ എമിയര്‍ ബൈര്‍ണ്‍ പറഞ്ഞു.പലര്‍ക്കും അവര്‍ ചെയ്യുന്ന ജോലിയില്‍ വിശ്വാസമില്ല.ഫുള്‍ എംപ്ലോയ്മെന്റുള്ള രാജ്യമാണ് അയര്‍ലണ്ട്. ഈ ഘട്ടത്തില്‍ ജീവനക്കാരെ വിലമതിക്കുന്നതിനൊപ്പം അവര്‍ക്ക് പിന്തുണ നല്‍കി ജോലി ചെയ്യാന്‍ തോന്നുന്ന അന്തരീക്ഷം സൃഷ്ടിക്കുന്നതിന് സ്ഥാപനങ്ങള്‍ മുന്‍ഗണന നല്‍കണമെന്നും ഇദ്ദേഹം പറഞ്ഞു.

ഐറിഷ് മലയാളി ന്യൂസ്