ബ്ളാക്ക്റോക്ക് സീറോ മലബാര്‍ പള്ളിയില്‍ നാളെ വിഭൂതി തിരുനാള്‍ ആചരണം
‘മനുഷ്യാ നീ മണ്ണാകുന്നു, മണ്ണിലേക്ക് തന്നെ നീ ഒരിക്കല്‍ മടങ്ങും’ എന്ന ഓര്‍മ പുതുക്കിക്കൊണ്ടാണ് വലിയ നോമ്പ് കാലത്തിന്റെ ആരംഭം കുറിക്കുന്ന കുരിശുവര പെരുന്നാള്‍ കടന്നുവരുന്നത്.
ആദ്യകാലങ്ങളില്‍ പശ്ചാതാപത്തിന്റെ പ്രതീകമായി ചാരം ഉപയോഗിച്ചിരുന്നു. പിന്നീട് പത്താം നൂറ്റാണ്ടിന്റെ അവസാനത്തോടെ പരസ്യമായി പാപമോചനം നല്‍കുവാനുള്ള ആധികാരിക അനുഷ്ഠാന ഘടകമായി ഇത് മാറി. അതിനുശേഷമാണ് അനുതാപജനിതമായ ഒരു നോമ്പ് കാലത്തിന്റെ തുടക്കം കുറിക്കുവാനുള്ള ദിവസമായി കുരിശുവര പെരുന്നാള്‍ രൂപം പ്രാപിച്ചത്.
മാനസാന്തരത്തിലും പ്രാര്‍ത്ഥനയിലും ഓരോ വ്യക്തിയുടെയും ഹൃദയത്തെ കേന്ദ്രീകരിച്ചുകൊണ്ട് കുമ്പസാരത്തിലൂടെയും വിഭൂതി തിരുനാള്‍ നോയമ്പിന്റെ ആരംഭം രേഖപ്പെടുത്തുന്നു.
അനുതാപം, ഉപവാസം, പ്രതിഫലനം, ആഘോഷം ഇതെല്ലാം ഉള്‍കൊള്ളുന്ന 40 ദിവസങ്ങളാണ് നോമ്പുകാലം. ഈ 40 ദിവസങ്ങള്‍ ക്രിസ്തു മരുഭൂമിയില്‍ നേരിട്ട പരീക്ഷണങ്ങളെയും അവന്റെ ഉപവാസത്തെയും പ്രതിനിധീകരിക്കുന്നു.
വിഭൂതി അണിഞ്ഞുകൊണ്ട് ഞങ്ങളുടെ പാപങ്ങളില്‍ ഞങ്ങള്‍ ഖേദിക്കുന്നു എന്നും ഞങ്ങളുടെ തെറ്റുകള്‍ തിരുത്തുവാനും ഹൃദയത്തെ ശുദ്ധീകരിക്കുവാനും ആഗ്രഹങ്ങള്‍ നിയന്ത്രിക്കുവാനും വിശുദ്ധിയില്‍ വളരുവാനും സാധിക്കട്ടെ എന്നും ഓരോ വിശ്വാസിയും പ്രാര്‍ത്ഥിക്കുന്നു. കൂടാതെ നമ്മുടെ സ്വന്തം മരണത്തിലും പാപത്തിലും ശ്രദ്ധകേന്ദ്രീകരിക്കുന്നതിലൂടെ വിശ്വാസികള്‍ക്ക് വിശുദ്ധിയില്‍ നോമ്പ് കാലത്തേക്ക് പ്രവേശിക്കാന്‍ കഴിയുന്നു.
എല്ലാ പൗരസ്ത്യ ക്രൈസ്തവ വിഭാഗക്കാരും അവരവരുടെ പാരമ്പര്യം അനുസരിച്ച് ആചാരക്രമങ്ങളിലേക്ക് തിരിച്ചുപോകണമെന്ന് രണ്ടാം വത്തിക്കാന്‍ കൗണ്‍സില്‍ ആഹ്വാനം ചെയ്തതനുസരിച്ചാണ് സീറോ മലബാര്‍ സഭ ‘ക്ഷാര ബുധന്‍’ പകരം ‘ക്ഷാര തിങ്കള്‍’ ആചരിക്കാന്‍ തുടങ്ങിയത് . വിഭൂതി തിരുനാളിന് മുമ്പുള്ള ഞായറാഴ്ച പേത്തുര്‍ത്തയോടു കൂടി വലിയനോമ്പിന്റെ ഒരുക്കങ്ങള്‍ ആരംഭിക്കുന്നു.
ഇന്ന് ഡണ്ടാല്‍ക്കില്‍ വിഭൂതി തിരുനാള്‍
ഡബ്ലിന്‍ സീറോ മലബാര്‍ സഭയുടെ ആഭിമുഖ്യത്തില്‍ വിവിധ ദേവാലയങ്ങളില്‍ നാളെ വിഭൂതി തിരുനാള്‍ ആചരണം നടത്തപെടുന്നുണ്ട്. ഇന്നാണ് ഡണ്ടാല്‍ക്കില്‍ വിഭൂതി തിരുനാള്‍ ആചരണം. കാസില്‍ ടൌണ്‍ സെന്റ് ജോസഫ്‌സ് പള്ളിയില്‍ വൈകിട്ട് 5 .30 നു വിശുദ്ധ കുര്‍ബാനയ്ക്ക് അനുബന്ധമായി വിഭൂതിയുടെ തിരുക്കര്‍മ്മങ്ങളും നടത്തപ്പെടും.
നാളെ ആരംഭിക്കുന്ന വലിയ നോമ്പ് ആചാരണത്തോടനുബന്ധിച്ച് സീറോ മലബാര്‍ സഭയുടെ അയര്‍ലണ്ടിലെമ്പാടുമുള്ള മുപ്പതോളം വിശുദ്ധ കുര്‍ബാന സെന്ററുകളില്‍ ഈ ആഴ്ച വിവിധ തിരുക്കര്‍മ്മങ്ങള്‍ നടത്തപ്പെടും.
വിഭൂതി തിരുനാളില്‍ പങ്കുകൊണ്ട് 50 നോമ്പിനായി ഒരുങ്ങുവാനും അനുഗ്രഹങ്ങള്‍ പ്രാപിക്കുവാനും എല്ലാ വിശാസികളേയും സ്‌നേഹപൂര്‍വ്വം സ്വാഗതം ചെയ്യുന്നതായി ബ്ളാക്ക്റോക്ക് സെയിന്റ് ജോസഫ് ഇടവക വികാരി റവ.ഫാ.ബൈജു ഡേവിസ് കണ്ണമ്പള്ളി അറിയിച്ചു.
ഐറിഷ് മലയാളി ന്യൂസ്
ഐറിഷ് മലയാളി ന്യൂസില്‍ നിന്നുള്ള പ്രധാന വാര്‍ത്തകളും, ബ്രേക്കിംഗ് ന്യൂസുകളും വാട്‌സാപ്പില്‍ ലഭിക്കുവാന്‍ താഴെയുള്ള ലിങ്കില്‍ ക്ലിക്ക് ചെയ്ത് ജോയിന്‍ ചെയ്യുക https://chat.whatsapp.com/GIyQ0yKn4MTDYghl03CtcD</a
Comments are closed.