അയര്‍ലണ്ടിലെ പൊതുമേഖലാ ജീവനക്കാരുടെ ശമ്പള പരിഷ്‌കരണത്തിന് സര്‍ക്കാര്‍ നടപടി തുടങ്ങി
ഡബ്ലിന്‍ : നിലവിലെ ശമ്പള കരാറായ ബില്‍ഡിംഗ് മൊമെന്റം ഈ വര്‍ഷാവസാനം കാലഹരണപ്പെടുന്നതിന്റെ പശ്ചാത്തലത്തില്‍ അയര്‍ലണ്ടിലെ പൊതുമേഖലാ ജീവനക്കാരുടെ ശമ്പള പരിഷ്‌കരണത്തിനൊരുങ്ങുകയാണ് സര്‍ക്കാര്‍.
വര്‍ദ്ധിച്ച പണപ്പെരുപ്പത്തിന്റെ കൂടി സാഹചര്യത്തില്‍ ജീവനക്കാരുടെ യൂണിയനുകള്‍ കരാര്‍ അവലോകനം ആവശ്യപ്പെട്ടിരുന്നു. ഇതിന്റെ ഭാഗമായി കഴിഞ്ഞയാഴ്ച പബ്ലിക് എക്സ്പെന്‍ഡച്ചര്‍ ആന്‍ഡ് റിഫോം വകുപ്പ് ഉദ്യോഗസ്ഥരും ഐറിഷ് കോണ്‍ഗ്രസ് ഓഫ് ട്രേഡ് യൂണിയന്‍ പബ്ലിക് സര്‍വീസ് കമ്മിറ്റിയും കൂടിക്കാഴ്ച നടത്തിയിരുന്നു.
ശമ്പള പരിഷ്‌കരണവുമായി ബന്ധപ്പെട്ട് അടുത്ത ആഴ്ച തന്റെ ഉദ്യോഗസ്ഥരുമായി ചര്‍ച്ച ചെയ്യുമെന്ന് പബ്ലിക് എക്സ്പെന്‍ഡിച്ചര്‍ മന്ത്രി മീഹോള്‍ മക് ഗ്രാത്ത് പറഞ്ഞു. അതിനു ശേഷം മെമ്മോറാണ്ടം സര്‍ക്കാരിന് സമര്‍പ്പിക്കുമെന്നും തുടര്‍ന്ന് യൂണിയനുകളുമായി ചര്‍ച്ച നടത്തുമെന്നും മന്ത്രി വ്യക്തമാക്കി.
ബില്‍ഡിംഗ് മൊമെന്റം പ്രകാരം ഒക്ടോബറില്‍ 1% ശമ്പള വര്‍ദ്ധനവ് ഷെഡ്യൂള്‍ ചെയ്തിട്ടുള്ളത്. ഒരു ശതമാനം ശമ്പള വര്‍ദ്ധനവിനും ഖജനാവില്‍ നിന്ന് 250 മില്യണ്‍ യൂറോയാണ് സര്‍ക്കാരിന് അധികമായി ചെലവു വരിക.
ശമ്പള പരിഷ്‌കരണത്തിന് അനുകൂലമെന്ന് പബ്ലിക് എക്സ്പെന്‍ഡിച്ചര്‍ മന്ത്രി
നിലവിലെ അസാധാരണമായ അനിശ്ചിതത്വത്തിന്റെ പശ്ചാത്തലത്തില്‍ ശമ്പള പരിഷ്‌കരണത്തിന് അനുകൂലമായ നിലപാടാണ് ഉള്ളതെന്ന് പബ്ലിക് എക്സ്പെന്‍ഡിച്ചര്‍ മന്ത്രി മീഹോള്‍ മക് ഗ്രാത്ത് വിശദീകരിച്ചു.
മൂന്ന് വര്‍ഷത്തേതു പോലെയുള്ള ദീര്‍ഘകാല കരാറല്ല, മറിച്ച് ഹ്രസ്വ കാല ശമ്പള പരിഷ്‌കരണ നടപടികളാകും ഇപ്പോഴത്തെ സാഹചര്യത്തില്‍ ഉചിതമെന്നും മന്ത്രി അഭിപ്രായപ്പെട്ടു. പണപ്പെരുപ്പത്തിന്റെ ആഘാതം നികത്താന്‍ ശമ്പള വര്‍ദ്ധനവ് കൊണ്ട് മാത്രം കഴിയില്ലെന്ന് മന്ത്രി മക് ഗ്രാത്ത് പറഞ്ഞു.
എന്നാല്‍ വര്‍ധിച്ചു വരുന്ന പണപ്പെരുപ്പം സര്‍ക്കാരിനെയും ജീവനക്കാരുടെ സംഘടനകളേയും പ്രതിസന്ധിയിലാക്കുന്നതാണ്. ഇത്തവണത്തെ ബജറ്റില്‍ 2.2%മെന്ന് പ്രവചിച്ച പണപ്പെരുപ്പം 2022ല്‍ ശരാശരി 6.5% ആയിരിക്കുമെന്നാണ് ഇപ്പോള്‍ കണക്കാക്കുന്നത് .20 വര്‍ഷത്തിനിടെയുള്ള ഏറ്റവും ഉയര്‍ന്ന പണപ്പെരുപ്പ നിരക്കാണിത്.
ഐറിഷ് മലയാളി ന്യൂസ്
ഐറിഷ് മലയാളി ന്യൂസില്‍ നിന്നുള്ള പ്രധാന വാര്‍ത്തകളും, ബ്രേക്കിംഗ് ന്യൂസുകളും വാട്സാപ്പില്‍ ലഭിക്കുവാന്‍ താഴെയുള്ള ലിങ്കില്‍ ക്ലിക്ക് ചെയ്ത് ജോയിന്‍ ചെയ്യുക: https://chat.whatsapp.com/Jbj00KGFL5E62rFCZBEP1x
Comments are closed.