യൂറോപ്യന്‍ സെന്‍ട്രല്‍ ബാങ്ക് പലിശനിരക്ക് വീണ്ടും കൂട്ടുന്നു…അടുത്ത മാസം രണ്ട് മുതല്‍ പ്രാബല്യത്തില്‍

ബ്രസല്‍സ് : യൂറോപ്യന്‍ സെന്‍ട്രല്‍ ബാങ്ക് പലിശനിരക്ക് വീണ്ടും കൂട്ടുന്നു. കഴിഞ്ഞ ജൂലൈയ്ക്ക് ശേഷം ഒമ്പതാം തവണയാണ് ഇ സി ബി പലിശ നിരക്ക് വര്‍ധിപ്പിക്കുന്നത്.പണപ്പെരുപ്പവും അനുബന്ധ പ്രശ്നങ്ങളും നേരിടുന്നതിനുള്ള നടപടികളുടെ ഭാഗമായി ജൂണ്‍ 15നും പലിശ നിരക്ക് 0.25% ഉയര്‍ത്തിയിരുന്നു.

ഇപ്പോഴത്തെ നടപടിയിലൂടെ ഇ സി ബിയുടെ അടിസ്ഥാന നിക്ഷേപ നിരക്ക് 4% ആയി വര്‍ധിച്ചു. ഈ വര്‍ധനവോടെ പലിശ നിരക്ക് 2001 മെയ് മുതലുള്ള ഏറ്റവും ഉയര്‍ന്ന നിരക്കിലേക്ക് എത്തിയിരിക്കുകയാണ്.

പണപ്പെരുപ്പ നിരക്കിനെ 2% എന്ന ഇടക്കാല ലക്ഷ്യത്തിലേക്ക് തിരിച്ചെത്തിക്കുന്നതിനാണ് പലിശ നിരക്ക് കൂട്ടാന്‍ ഗവേണിംഗ് കൗണ്‍സില്‍ തീരുമാനിച്ചതെന്ന ഇ സി ബി വ്യക്തമാക്കുന്നു.മൂന്ന് പ്രധാന പലിശ നിരക്കുകള്‍ 25 ബേസിസ് പോയിന്റ് ഉയര്‍ത്താനാണ് തീരുമാനമെന്നും ബാങ്ക് പ്രസ്താവനയില്‍ വിശദീകരണമുണ്ട് .

പണപ്പെരുപ്പം രണ്ടു ശതമാനത്തിലെത്തിക്കുകയെന്ന ലക്ഷ്യം മുന്‍നിര്‍ത്തിയാണ് ഇ സി ബിയുടെ നടപടികളെങ്കിലും പണപ്പെരുപ്പത്തിന്റെ തോത് ഇപ്പോഴും ഉയര്‍ന്ന നിലയില്‍ത്തന്നെയാണെന്ന് ചൂണ്ടിക്കാണിക്കപ്പെടുന്നു.

റീഫിനാന്‍സിങ് ,നാമമാത്ര വായ്പകള്‍, നിക്ഷേപം എന്നിവയുടെ പലിശ നിരക്കുകള്‍ യഥാക്രമം 4.25%, 4.50%, 3.75% എന്നിങ്ങനെയാകും വര്‍ധിപ്പിക്കുക. വര്‍ധന അടുത്ത മാസം രണ്ട് മുതല്‍ പ്രാബല്യത്തില്‍ വരുമെന്നും ബാങ്ക് അറിയിച്ചു.

യൂറോ സോണിലെ 20 രാജ്യങ്ങള്‍ വര്‍ഷത്തിന്റെ തുടക്കത്തില്‍ത്തന്നെ സാമ്പത്തികമാന്ദ്യത്തിലാണെന്ന് ഇ സി ബി പ്രസ്താവന വ്യക്തമാക്കുന്നു. തുടര്‍ച്ചയായ രണ്ട് പാദങ്ങളിലും അതിന് മാറ്റമുണ്ടായില്ല.വിലക്കയറ്റവും വര്‍ധിക്കുകയാണ്. യൂറോസോണിലെ പണപ്പെരുപ്പ നിരക്ക് ജൂണില്‍ 5.5% ആയിരുന്നു .കഴിഞ്ഞ വര്‍ഷത്തെ ഇരട്ട അക്കത്തില്‍ നിന്ന് താഴേക്കെത്തിയെങ്കിലും ഇ സി ബിയുടെ 2% എന്ന ലക്ഷ്യത്തിലെത്തിയിട്ടില്ല.

പലിശ നിരക്കിലെ വര്‍ധനവ് ട്രാക്കര്‍ മോര്‍ട്ട്ഗേജ് ഉള്ളവരെ ഗുരുതരമായി ബാധിക്കുമെന്ന് ചൂണ്ടിക്കാണിക്കപ്പെടുന്നു.അവരുടെ മോര്‍ട്ട്ഗേജ് പേയ്‌മെന്റുകളില്‍ 25 യൂറോയുടെ വരെ വര്‍ധനവുണ്ടാകുമെന്ന് അസോസിയേഷന്‍ ഓഫ് ഐറിഷ് മോര്‍ട്ട്ഗേജ് അഡൈ്വസേഴ്‌സ് ചെയര്‍പേഴ്‌സണ്‍ ട്രെവര്‍ ഗ്രാന്റ് പറഞ്ഞു

ഐറിഷ് മലയാളി ന്യൂസ്